ಸಾಮಾನ್ಯವಾಗಿ ಪ್ರೇಯಸಿ ಮುನಿಸಿಕೊಂಡು ಹೋದರೆ ಅಥವಾ ಮದುವೆಗೆ ಒಪ್ಪದಿದ್ದರೆ ಪ್ರಿಯತಮ ಸೆಲ್ ಟವರ್ ಏರಿ ಆತ್ಮಹತ್ಯೆ ಬೆದರಿಕೆ ಹಾಕುವುದನ್ನು ನಾವು ಸಿನಿಮಾಗಳಲ್ಲಿ ಅಥವಾ ಸುದ್ದಿಯಲ್ಲಿ ನೋಡಿರುತ್ತೇವೆ. ಆದರೆ ಬಿಹಾರದಲ್ಲಿ ನಡೆದ (Girl Climbs Cell Tower) ಈ ಘಟನೆ ಮಾತ್ರ ತೀರಾ ಉಲ್ಟಾ! ತನ್ನ ಪ್ರಿಯತಮನನ್ನು ಪೊಲೀಸರು ಹಿಡಿದುಕೊಂಡು ಹೋದರು ಎಂಬ ಕೋಪಕ್ಕೆ ಯುವತಿಯೊಬ್ಬಳು ಹೈ-ವೋಲ್ಟೇಜ್ ಡ್ರಾಮಾ ಮಾಡಿದ್ದಾಳೆ.
Girl Climbs Cell Tower – ನಡೆದಿದ್ದೇನು?
ಈ ವಿಚಿತ್ರ ಘಟನೆ ನಡೆದಿರುವುದು ಬಿಹಾರದ ಗೋಪಾಲ್ಗಂಜ್ ಜಿಲ್ಲೆಯ ಬಂಕಟ ಗ್ರಾಮದಲ್ಲಿ. ಗ್ರಾಮದ ಯುವತಿಯೊಬ್ಬಳು ಅದೇ ಊರಿನ ಯುವಕನನ್ನು ಪ್ರಾಣಕ್ಕಿಂತ ಹೆಚ್ಚಾಗಿ ಪ್ರೀತಿಸುತ್ತಿದ್ದಳು. ಆದರೆ ಇವರ ಪ್ರೇಮಕ್ಕೆ ಯುವತಿಯ ಮನೆಯವರು ‘ವಿಲನ್’ ಆಗಿದ್ದರು. ಮನೆಯವರ ವಿರೋಧದ ನಡುವೆಯೂ ಪ್ರೀತಿ ಮುಂದುವರಿಸಿದ್ದ ಈ ಜೋಡಿಯ ಮೇಲೆ ಕೋಪಗೊಂಡ ಯುವತಿಯ ಪೋಷಕರು, ಪ್ರಿಯತಮನ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದರು. ದೂರು ದಾಖಲಾಗುತ್ತಿದ್ದಂತೆ ಪೊಲೀಸರು ಯುವಕನನ್ನು ವಶಕ್ಕೆ ಪಡೆದರು. ಈ ವಿಷಯ ತಿಳಿಯುತ್ತಿದ್ದಂತೆ ಆವೇಶಕ್ಕೊಳಗಾದ ಯುವತಿ, ನೇರವಾಗಿ ಗ್ರಾಮದಲ್ಲಿದ್ದ ಸೆಲ್ ಟವರ್ ಏರಿ ಕುಳಿತಿದ್ದಾಳೆ!
ಪೊಲೀಸರಿಗೇ ಶಾಕ್ ಕೊಟ್ಟ ಯುವತಿಯ ಪಟ್ಟು!
“ನನ್ನ ಪ್ರಿಯತಮನನ್ನು ಬಿಟ್ಟರೆ ಮಾತ್ರ ನಾನು ಕೆಳಗೆ ಇಳಿಯುತ್ತೇನೆ, ಇಲ್ಲದಿದ್ದರೆ ಇಲ್ಲಿಂದಲೇ ಜಿಗಿದು ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ” ಎಂದು ಯುವತಿ ಕಿರುಚಾಡಲು ಆರಂಭಿಸಿದಳು. ನೋಡನೋಡುತ್ತಿದ್ದಂತೆ ಗ್ರಾಮಸ್ಥರೆಲ್ಲರೂ ಜಮಾಯಿಸಿದರು. ಪೊಲೀಸರು ಸ್ಥಳಕ್ಕೆ ಧಾವಿಸಿ ಎಷ್ಟೇ ಮನವೊಲಿಸಿದರೂ ಯುವತಿ ಮಾತ್ರ ತನ್ನ ಪಟ್ಟಿನಿಂದ ಹಿಂದೆ ಸರಿಯಲಿಲ್ಲ. Read this also : ಪ್ರೀತಿ ನಂಬಿ ಮತಾಂತರಗೊಂಡ ಮಹಿಳೆಗೆ ಪತಿಯಿಂದಲೇ ವಂಚನೆ; ಶ್ರೀದೇವಿ ಈಗ ಹಬೀಬಾ ಆದ ಕರುಣಾಜನಕ ಕಥೆ!
ಹ್ಯಾಪಿ ಎಂಡಿಂಗ್: ಪ್ರಿಯಕರನ ನೋಡಿ ಎಮೋಷನಲ್!
ಪರಿಸ್ಥಿತಿ ಕೈಮೀರುತ್ತಿರುವುದನ್ನು ಕಂಡ ಪೊಲೀಸರು ಅನಿವಾರ್ಯವಾಗಿ ಯುವಕನನ್ನು ಜೈಲಿನಿಂದ ಕರೆತಂದು ಟವರ್ ಮುಂದೆ ನಿಲ್ಲಿಸಿದರು. ಪ್ರಿಯಕರನನ್ನು ನೋಡುತ್ತಿದ್ದಂತೆ ಶಾಂತಳಾದ ಯುವತಿ ಮೆಲ್ಲನೆ ಕೆಳಗಿಳಿದು ಬಂದಳು. ಕೆಳಗೆ ಬಂದ ತಕ್ಷಣ ಎಲ್ಲರ ಮುಂದೆಯೇ ತನ್ನ ಪ್ರಿಯತಮನನ್ನು ಅಪ್ಪಿಕೊಂಡು ಕಣ್ಣೀರಿಟ್ಟಿದ್ದಾಳೆ. ಈ ದೃಶ್ಯ ಕಂಡು ಗ್ರಾಮಸ್ಥರು ಒಂದು ಕ್ಷಣ ದಂಗಾಗಿದ್ದಾರೆ.
ನೆಟ್ಟಿಗರ ಕಾಮೆಂಟ್ಸ್ ಚಿಂದಿ!
ಈ ಘಟನೆಯ ವಿಡಿಯೋ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಸಕ್ಕತ್ ವೈರಲ್ ಆಗುತ್ತಿದೆ. ವಿಡಿಯೋ ನೋಡಿದ ನೆಟ್ಟಿಗರು ತಮ್ಮದೇ ಶೈಲಿಯಲ್ಲಿ ಕಾಮೆಂಟ್ ಮಾಡುತ್ತಿದ್ದಾರೆ.
ವೈರಲ್ ವಿಡಿಯೋ ಇಲ್ಲಿದೆ ನೋಡಿ : Click Here
“ಇಂಥ ಪ್ರೇಯಸಿ ಸಿಗಲು ಇವನು ಪುಣ್ಯ ಮಾಡಿರಬೇಕು!” ಎಂದು ಒಬ್ಬರು ಬರೆದರೆ, ಮತ್ತೊಬ್ಬರು “ಇವರ ಪ್ರೀತಿಗೆ ಆ ಶೋಲೆ ಚಿತ್ರದ ಧರ್ಮೇಂದ್ರನೇ ಸಾಟಿ” ಎಂದು ತಮಾಷೆ ಮಾಡಿದ್ದಾರೆ. ಇನ್ನು ಕೆಲವರು “ತಕ್ಷಣ ಇವರಿಗೆ ಮದುವೆ ಮಾಡಿಸಿ ಬಿಡಿಪ್ಪಾ” ಎಂದು ಉಚಿತ ಸಲಹೆ ನೀಡುತ್ತಿದ್ದಾರೆ. ಪ್ರೀತಿಗಾಗಿ ಏನೇ ಬೇಕಾದರೂ ಮಾಡುವ ಇಂದಿನ ಕಾಲದಲ್ಲಿ, ಈ ಬೆದರಿಕೆ ತಂತ್ರ ಮಾತ್ರ ಸ್ವಲ್ಪ ಅಪಾಯಕಾರಿಯಾದರೂ ಜನರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ.