ಮಕ್ಕಳನ್ನು ಶಾಲೆಗೆ, ಅಂಗನವಾಡಿಗೆ ಕಳುಹಿಸುವುದು ಅಕ್ಷರ ಕಲಿಯಲಿ, ಒಳ್ಳೆಯ ಸಂಸ್ಕಾರ ಬೆಳೆಯಲಿ ಎಂದು. ಆದರೆ, ಮಕ್ಕಳ ಪಾಲಿಗೆ ದೇವರೆಂದು ನಂಬುವ ಶಿಕ್ಷಕರು ಮತ್ತು ಸಿಬ್ಬಂದಿಯೇ ಅವರ ಕೈಯಿಂದ (Chhindwara Anganwadi Viral Video) ಅಮಾನವೀಯ ಕೆಲಸ ಮಾಡಿಸಿದರೆ ಪೋಷಕರ ಗತಿಯೇನು?
ಮಧ್ಯಪ್ರದೇಶದಿಂದ ಹೊರಬರುತ್ತಿರುವ ಸಾಲು ಸಾಲು ವಿಡಿಯೋಗಳು ಇಡೀ ಸಮಾಜ ತಲೆತಗ್ಗಿಸುವಂತೆ ಮಾಡಿವೆ. ಇತ್ತೀಚೆಗಷ್ಟೇ ವೈರಲ್ ಆಗಿರುವ ವಿಡಿಯೋವೊಂದರಲ್ಲಿ ಅಂಗನವಾಡಿ ಸಹಾಯಕಿಯೊಬ್ಬರು ಪುಟ್ಟ ಬಾಲಕಿಯಿಂದ ಕಾಲು ಮಸಾಜ್ ಮಾಡಿಸಿಕೊಳ್ಳುತ್ತಿರುವ ದೃಶ್ಯ ಸಾರ್ವಜನಿಕರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
Chhindwara Anganwadi Viral Video – ಛಿಂದ್ವಾರಾ ಅಂಗನವಾಡಿಯಲ್ಲಿ ನಡೆದಿದ್ದೇನು? ಶಾಕಿಂಗ್ ವಿಡಿಯೋ ವೈರಲ್
ಮಧ್ಯಪ್ರದೇಶದ ಛಿಂದ್ವಾರಾ ಜಿಲ್ಲೆಯ ಪಾರಾಸಿಯಾ ವ್ಯಾಪ್ತಿಯ ಚಂದಾಮೆಟಾದ ವಾರ್ಡ್ ಸಂಖ್ಯೆ 12ರ (ಚಾಚಾ ಮೊಹಲ್ಲಾ) ಅಂಗನವಾಡಿ ಕೇಂದ್ರದಲ್ಲಿ ಈ ಅಮಾನವೀಯ ಘಟನೆ ಬೆಳಕಿಗೆ ಬಂದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ವಿಡಿಯೋದಲ್ಲಿ ಮಹಿಳಾ ಸಹಾಯಕಿಯೊಬ್ಬರು ನೆಲದ ಮೇಲೆ ಆರಾಮವಾಗಿ ಮಲಗಿರುವುದು ಕಂಡುಬಂದಿದೆ.
ಪುಟ್ಟ ಮಗುವಿನಿಂದ ಕಾಲು ತುಳಿಸಿಕೊಂಡ ಮಹಿಳಾ ಸಿಬ್ಬಂದಿ
ನೆಲದ ಮೇಲೆ ಮಲಗಿರುವ ಮಹಿಳೆಯ ಕಾಲಿನ ಮೇಲೆ ಪುಟ್ಟ ಬಾಲಕಿಯೊಬ್ಬಳು ನಿಂತು, ತನ್ನ ಪಾದಗಳಿಂದ ಆಕೆಯ ಕಾಲುಗಳನ್ನು ಒತ್ತುತ್ತಿದ್ದಾಳೆ. ಅಷ್ಟಕ್ಕೇ ನಿಲ್ಲದ ಆಕೆ, “ಇನ್ನಷ್ಟು ಜೋರಾಗಿ ಒತ್ತು, ಪಾದವನ್ನು ಇಲ್ಲಿಗೆ ಸರಿಸು” ಎಂದು ಆ ಪುಟ್ಟ ಮಗುವಿಗೆ ಆಜ್ಞೆ ಮಾಡುತ್ತಿರುವುದು ವಿಡಿಯೋದಲ್ಲಿ ಸ್ಪಷ್ಟವಾಗಿ ಕೇಳಿಸುತ್ತದೆ. ಪೂರ್ವ ಪ್ರಾಥಮಿಕ (Chhindwara Anganwadi Viral Video) ಶಿಕ್ಷಣ ಮತ್ತು ಪೌಷ್ಟಿಕ ಆಹಾರ ನೀಡಬೇಕಾದ ಕೇಂದ್ರದಲ್ಲೇ ಇಂತಹ ಶೋಷಣೆ ನಡೆಯುತ್ತಿರುವುದು ಪೋಷಕರ ನಿದ್ದೆಗೆಡಿಸಿದೆ. ಘಟನೆ ಸಂಬಂಧ ಅಧಿಕಾರಿಗಳ ಮುಂದಿನ ಕ್ರಮಕ್ಕಾಗಿ ಸಾರ್ವಜನಿಕರು ಕಾಯುತ್ತಿದ್ದಾರೆ.
ಭೋಪಾಲ್‌ನಲ್ಲೂ ನಡೆದಿತ್ತು ಇಂಥದ್ದೇ ಕೃತ್ಯ: ಟೀಚರ್ ಹೇಳಿದ್ದೇನು?
ಇದು ಕೇವಲ ಛಿಂದ್ವಾರಾದ ಕತೆಯಲ್ಲ; ಕೆಲವೇ ದಿನಗಳ ಹಿಂದೆ ಮಧ್ಯಪ್ರದೇಶದ ರಾಜಧಾನಿ ಭೋಪಾಲ್‌ನಲ್ಲೂ ಇಂಥದ್ದೇ ಅಸಂಬದ್ಧ ಘಟನೆ ವರದಿಯಾಗಿತ್ತು. ಗಾಂಧಿನಗರದ ಮಹಾತ್ಮ ಗಾಂಧಿ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಶಿಕ್ಷಕಿಯೊಬ್ಬರು ತರಗತಿ ನಡೆಯುವ ವೇಳೆಯಲ್ಲೇ ವಿದ್ಯಾರ್ಥಿನಿಯಿಂದ ಕಾಲು ಮಸಾಜ್ ಮಾಡಿಸಿಕೊಂಡಿದ್ದರು. Read this also : ‘ದಳಪತಿ ವಿಜಯ್‌ರನ್ನು ಒಮ್ಮೆ ತಬ್ಬಿಕೊಳ್ಳಬೇಕು, ಆಮೇಲೆ ಸಾಯಬೇಕು!’: ದೆಹಲಿ ರಸ್ತೆಯಲ್ಲಿ ಮಲಗಿ ಹೈಡ್ರಾಮ ಸೃಷ್ಟಿಸಿದ ಮಹಿಳೆಯ ವಿಡಿಯೋ ವೈರಲ್
ಕಾಲು ನೋವಿನ ನೆಪ ಹೇಳಿದ ಶಿಕ್ಷಕಿ
ವೈರಲ್ ವಿಡಿಯೋದಲ್ಲಿ (Viral Video Link Here) ಶಿಕ್ಷಕಿ ಒಂದು ಕುರ್ಚಿಯ ಮೇಲೆ ಕುಳಿತು ಮತ್ತೊಂದು ಕುರ್ಚಿಯ ಮೇಲೆ ಕಾಲಿಟ್ಟಿದ್ದರು. ಬಾಲಕಿಯೊಬ್ಬಳು ಆಕೆಯ ಕಾಲನ್ನು ಮಸಾಜ್ ಮಾಡುತ್ತಿದ್ದಳು. ಈ ವಿಚಾರ ದೊಡ್ಡ ವಿವಾದವಾಗುತ್ತಿದ್ದಂತೆ ಪ್ರತಿಕ್ರಿಯಿಸಿದ ಶಿಕ್ಷಕಿ, “ಶಾಲೆಯ ಗೇಟ್ ಬಳಿ ಬಿದ್ದಿದ್ದ ಒಡೆದ ಟೈಲ್ಸ್ ಹೊಂಡಕ್ಕೆ ಕಾಲಿಟ್ಟು ಪಾದ ಉಳುಕಿತ್ತು. ವಿಪರೀತ ನೋವಿದ್ದ ಕಾರಣ ವಿದ್ಯಾರ್ಥಿನಿಯೇ ತಾನಾಗಿ ಬಂದು ಮಸಾಜ್ ಮಾಡಿದಳು” ಎಂದು ತನ್ನ ತಪ್ಪನ್ನು ಮುಚ್ಚಿಹಾಕಲು ಯತ್ನಿಸಿದ್ದರು.
ಶಾಲೆಗೆ ಮದ್ಯ ತರಲು ಮಕ್ಕಳಿಗೆ ಸೂಚನೆ: ಛತ್ತರ್‌ಪುರ ಶಿಕ್ಷಕನ ಕೃತ್ಯ
ಇವೆಲ್ಲಕ್ಕಿಂತಲೂ ಭೀಕರ ಪ್ರಕರಣ ಛತ್ತರ್‌ಪುರ ಜಿಲ್ಲೆಯ ಬಾಮ್ನೌರ್ ಕ್ಲಸ್ಟರ್ ವ್ಯಾಪ್ತಿಯ ಹೈದರಾಬಾದ್ ಗ್ರಾಮದ ಸರ್ಕಾರಿ ಮಾಧ್ಯಮಿಕ ಶಾಲೆಯಲ್ಲಿ ನಡೆದಿದೆ. ಇಲ್ಲಿನ ಭಗವಾನ್‌ದಾಸ್ ಅಹಿರ್ವಾರ್ ಎಂಬ ಶಿಕ್ಷಕ ಶಾಲೆಗೆ ಮದ್ಯ ಸೇವಿಸಿ ಬರುವುದಲ್ಲದೆ, ಅಪ್ರಾಪ್ತ ವಿದ್ಯಾರ್ಥಿಗಳನ್ನು ಅಂಗಡಿಗೆ ಕಳುಹಿಸಿ ಮದ್ಯ ತರಿಸುತ್ತಿದ್ದ ಎಂಬ ಗಂಭೀರ ಆರೋಪ ಎದುರಿಸುತ್ತಿದ್ದಾನೆ.
ಕೈಯಲ್ಲಿ ಮದ್ಯದ ಬಾಟಲಿ ಹಿಡಿದಿದ್ದ ವಿದ್ಯಾರ್ಥಿಗಳು
ವಿದ್ಯಾರ್ಥಿಗಳು ಕೈಯಲ್ಲಿ ಮದ್ಯದ ಬಾಟಲಿ ಹಿಡಿದುಕೊಂಡು, “ಇದು ನಮ್ಮ ಮಾಸ್ಟರ್ ಸಾಬ್‌ಗೆ” ಎಂದು ಮಾತನಾಡುತ್ತಿರುವ ವಿಡಿಯೋ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದೆ. ಅಷ್ಟೇ ಅಲ್ಲದೆ, ಈ ವಿಡಿಯೋ ಸೆರೆಹಿಡಿದ ವ್ಯಕ್ತಿಗೆ ಶಿಕ್ಷಕನ ಪತ್ನಿ ಬೆದರಿಕೆ ಹಾಕಿರುವ ಆಡಿಯೋ ಕ್ಲಿಪ್ ಕೂಡ ವೈರಲ್ ಆಗಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಜಿಲ್ಲಾ ಶಿಕ್ಷಣಾಧಿಕಾರಿ (DEO) ಪಿ.ಕೆ. ರೈಕ್ವಾರ್, “ಪ್ರಕರಣದ ಬಗ್ಗೆ ದೂರು ಬಂದ ತಕ್ಷಣ ಕೂಲಂಕಷ ತನಿಖೆ ನಡೆಸಲಾಗುವುದು. ಆರೋಪ ಸಾಬೀತಾದರೆ ನಿಯಮಾನುಸಾರ ಕಠಿಣ ಕಾನೂನು ಮತ್ತು ಶಿಸ್ತು ಕ್ರಮ ಕೈಗೊಳ್ಳಲಾಗುವುದು” ಎಂದು ಸ್ಪಷ್ಟಪಡಿಸಿದ್ದಾರೆ.
ಶಿಕ್ಷಣ ಸಂಸ್ಥೆಗಳಲ್ಲಿ ಮುಗ್ಧ ಮಕ್ಕಳ ಶೋಷಣೆಗೆ ಕೊನೆ ಎಂದು?
ಮಧ್ಯಪ್ರದೇಶದ ಶಾಲೆಗಳಲ್ಲಿ ಇಂತಹ ಘಟನೆಗಳು ಹೊಸತೇನಲ್ಲ. ಈ ಹಿಂದೆಯೂ (Chhindwara Anganwadi Viral Video) ಶಿಕ್ಷಕರು ತರಗತಿಯಲ್ಲಿ ಗೊರಕೆ ಹೊಡೆದು ಮಲಗಿರುವಾಗ, ಮಕ್ಕಳು ಮೈದಾನದಲ್ಲಿ ಗುದ್ದಲಿ ಹಿಡಿದು ಮಣ್ಣು ಅಗೆಯುವುದು, ಬಿಸಿಯೂಟದ ಎಂಜಲು ಪಾತ್ರೆಗಳನ್ನು ತೊಳೆಯುವ ದೃಶ್ಯಗಳು ಬಹಿರಂಗವಾಗಿದ್ದವು. ಶಾಲೆಗೆ ಬರುವ ಮುಗ್ಧ ಮಕ್ಕಳನ್ನು ಜೀತದಾಳುಗಳಂತೆ ನಡೆಸಿಕೊಳ್ಳುವ ಇಂತಹ ಸಿಬ್ಬಂದಿ ವಿರುದ್ಧ ಕೇವಲ ಅಮಾನತು ಅಥವಾ ಎಚ್ಚರಿಕೆಯಷ್ಟೇ ಸಾಲದು, ಶಾಶ್ವತವಾಗಿ ಸೇವೆಯಿಂದ ವಜಾಗೊಳಿಸುವಂತಹ ಕಠಿಣ ಶಿಕ್ಷೆಯಾಗಬೇಕು ಎಂಬುದು ಸಾರ್ವಜನಿಕರ ಸ್ಪಷ್ಟ ಆಗ್ರಹವಾಗಿದೆ.
