ಇತ್ತೀಚಿನ ದಿನಗಳಲ್ಲಿ ಪ್ರೀತಿ, ಪ್ರೇಮ, ಮೋಜು-ಮಸ್ತಿಗಾಗಿ ಯುವಜನತೆ ಯಾವ ಮಟ್ಟಕ್ಕಾದರೂ ಇಳಿಯುತ್ತಾರೆ ಅನ್ನೋದಕ್ಕೆ ಅಸ್ಸಾಂನಲ್ಲಿ ನಡೆದ ಈ ಆಘಾತಕಾರಿ ಘಟನೆಯೇ ತಾಜಾ ಉದಾಹರಣೆ. ಮಕ್ಕಳು ದೊಡ್ಡವರಾಗಿ ತಮಗೆ ಆಸರೆಯಾಗುತ್ತಾರೆ ಎಂದು ಪೋಷಕರು ಕನಸು ಕಂಡರೆ, ಇಲ್ಲೊಬ್ಬ ಮಗ ತನ್ನ ಪ್ರೇಯಸಿಯ (Jorhat Theft Case) ದುಬಾರಿ ಆಸೆಗಳನ್ನು ಪೂರೈಸುವುದಕ್ಕಾಗಿ ಹೆತ್ತವರನ್ನೇ ನಡುರಸ್ತೆಗೆ ತಂದಿದ್ದಾನೆ! ಹೆತ್ತವರು ಕಷ್ಟಪಟ್ಟು ಸಂಪಾದಿಸಿದ್ದ 50 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣ ಹಾಗೂ ನಗದನ್ನು ಕದ್ದು ಈಗ ಕಂಬಿ ಎಣಿಸುತ್ತಿದ್ದಾನೆ. ಮಗನ ಕಳ್ಳತನದ ಬಗ್ಗೆ ಅರಿತ ತಂದೆಯೇ ಸ್ವತಃ ಪೊಲೀಸ್ ಠಾಣೆ ಮೆಟ್ಟಿಲೇರಿ ಎಫ್ಐಆರ್ ದಾಖಲಿಸಿರುವುದು ಈ ಪ್ರಕರಣದ ಅಚ್ಚರಿಯ ಸಂಗತಿ.
Jorhat Theft Case – ಲವರ್ ಡಿಮ್ಯಾಂಡ್ ಈಡೇರಿಸಲು 50 ಲಕ್ಷ ರೂ. ಕಳ್ಳತನದ ಸ್ಕೆಚ್!
ಅಸ್ಸಾಂನ ಜೋರ್ಹತ್ನಲ್ಲಿ ವಾಸವಿರುವ ಯಶ್ ಧನುಕಾ ಎಂಬ ಯುವಕನೇ ತನ್ನ ಮನೆಯಲ್ಲಿ ಕನ್ನ ಹಾಕಿದ ಆರೋಪಿ. ಹೆತ್ತವರು ಯಾವುದೋ ಕೆಲಸದ ನಿಮಿತ್ತ ಕೆಲವು ದಿನಗಳ ಕಾಲ ಊರ ಹೊರಗೆ ಹೋಗಿದ್ದರು. ಮನೆಯಲ್ಲಿ ಯಾರೂ ಇಲ್ಲದ ಸಮಯವನ್ನು ಕಾಯುತ್ತಿದ್ದ ಯಶ್, ತನ್ನ ಪೋಷಕರ ಕೋಣೆಯಲ್ಲಿದ್ದ ಲಾಕರ್ ಒಡೆದಿದ್ದಾನೆ. ಲಾಕರ್ನಲ್ಲಿದ್ದ 50 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣ ಹಾಗೂ ನಗದನ್ನು ಯಾವುದೇ ಅಂಜಿಕೆ ಇಲ್ಲದೆ ದೋಚಿದ್ದಾನೆ.
ಪ್ರೇಯಸಿಗೆ 1.5 ಲಕ್ಷದ ಐಫೋನ್, ರೆಸ್ಟೋರೆಂಟ್ಗಳಲ್ಲಿ ಭರ್ಜರಿ ಪಾರ್ಟಿ!
ಯಶ್ ಈ ಕಳ್ಳತನ ಮಾಡಿದ್ದು ತನ್ನ ಗೆಳತಿ ಪುಬಾಲಿ ದತ್ತಾಳನ್ನು ಇಂಪ್ರೆಸ್ ಮಾಡಲು! ಕದ್ದ ಚಿನ್ನಾಭರಣಗಳಲ್ಲಿ ಕೆಲವನ್ನು ಮಾರಿ ಬಂದ ಹಣದಲ್ಲಿ, ಪ್ರೇಯಸಿಗೆ ಬರೋಬ್ಬರಿ 1.5 ಲಕ್ಷ ರೂಪಾಯಿ ಬೆಲೆಬಾಳುವ ಐಫೋನ್ (iPhone) ಅನ್ನು ಉಡುಗೊರೆಯಾಗಿ ನೀಡಿದ್ದಾನೆ. ಕೇವಲ ಮೊಬೈಲ್ ಮಾತ್ರವಲ್ಲ, ಆಕೆಯ ಜೊತೆ ದುಬಾರಿ ರೆಸ್ಟೋರೆಂಟ್ಗಳಿಗೆ ಭೇಟಿ ನೀಡುವುದು, ಪಾರ್ಟಿ, ಔಟಿಂಗ್ ಎಂದು ಲಕ್ಷಾಂತರ ರೂಪಾಯಿ ಹಣವನ್ನು ನೀರಿನಂತೆ ಖರ್ಚು ಮಾಡಿದ್ದಾನೆ. Read this also : ಜಬಲ್ಪುರದ ಆಸ್ಪತ್ರೆಯ ವಾರ್ಡ್ನಲ್ಲೇ ಕುಳಿತು ಮದ್ಯಪಾನ ಮಾಡಿದ ಮಹಿಳೆ; ವಿಡಿಯೋ ವೈರಲ್!
ಪೊಲೀಸ್ ತನಿಖೆಯಿಂದ ಬಯಲಾದ ರೋಚಕ ಸತ್ಯಗಳು
ಪೊಲೀಸ್ ತನಿಖೆಯ ವೇಳೆ ಇದೀಗ ಹಲವು ಅಚ್ಚರಿಯ ಸಂಗತಿಗಳು ಬಯಲಾಗಿವೆ. ಯಶ್ ಪೋಷಕರು ಮನೆಯಲ್ಲಿ ಇಲ್ಲದ ಸಮಯದಲ್ಲಿ ಆತನ ಗೆಳತಿ ಪುಬಾಲಿ ದತ್ತಾ ಕೂಡ ಆ ಮನೆಗೆ ಭೇಟಿ ನೀಡಿದ್ದಳು ಎಂಬ ಮಾಹಿತಿ ಲಭ್ಯವಾಗಿದೆ. ಹೀಗಾಗಿ, ಈ ಕಳ್ಳತನದ ಬಗ್ಗೆ ಪುಬಾಲಿಗೆ ಮೊದಲೇ ತಿಳಿದಿತ್ತೇ? ತನಗೆ ಸಿಗುತ್ತಿರುವ ದುಬಾರಿ ಗಿಫ್ಟ್ಗಳು ಎಲ್ಲಿಂದ ಬರುತ್ತಿವೆ ಎಂಬ ಬಗ್ಗೆ ಆಕೆಗೆ ಗೊತ್ತಿತ್ತೇ ಎಂಬ ಆಯಾಮದಲ್ಲಿ ಜೋರ್ಹತ್ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ. ಇದರ ಜೊತೆಗೆ, ಅವರಿಬ್ಬರ ನಡುವೆ ನಡೆದಿರುವ ವಾಟ್ಸಾಪ್ (WhatsApp) ಚಾಟ್ಸ್ ಹಾಗೂ ಕಾಲ್ ಹಿಸ್ಟರಿಯನ್ನು ಕೂಡ ಪೊಲೀಸರು ಕಲೆಹಾಕುತ್ತಿದ್ದಾರೆ.
ಮಗನಿಗೆ ತಕ್ಕ ಪಾಠ ಕಲಿಸಲು ಪೊಲೀಸ್ ಮೆಟ್ಟಿಲೇರಿದ ತಂದೆ
ಊರಿನಿಂದ ವಾಪಸ್ ಬಂದ ಪೋಷಕರಿಗೆ ಮನೆಯ ಲಾಕರ್ ಒಡೆದಿರುವುದು ಕಂಡು ದೊಡ್ಡ ಆಘಾತವೇ ಎದುರಾಗಿದೆ. 50 ಲಕ್ಷ ಮೌಲ್ಯದ ನಗದು, ಒಡವೆ ನಾಪತ್ತೆಯಾಗಿತ್ತು. ಕಳ್ಳತನ ಮಾಡಿದ್ದು ಹೊರಗಿನವರಲ್ಲ, ತಮ್ಮ ಹೆತ್ತ ಮಗನೇ ಎಂಬ ಕಟು ಸತ್ಯ ತಿಳಿದು ಕುಟುಂಬ ತೀವ್ರ ಮಾನಸಿಕ ಆಘಾತಕ್ಕೊಳಗಾಗಿದೆ.
ತಮ್ಮ ಜೀವಮಾನದ ಸಂಪಾದನೆಯನ್ನೇ ಲೂಟಿ ಮಾಡಿದ ಮಗನಿಗೆ ತಕ್ಕ ಪಾಠ ಕಲಿಸಲು ನಿರ್ಧರಿಸಿದ ತಂದೆ, ಯಾವುದೇ ಮುಲಾಜಿಲ್ಲದೆ ನೇರವಾಗಿ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ. ಮಗನ ವಿರುದ್ಧ ಎಫ್ಐಆರ್ (FIR) ದಾಖಲಿಸಿದ್ದಾರೆ. ದೂರಿನ ಆಧಾರದ ಮೇಲೆ ಪೊಲೀಸರು ಭಾರತೀಯ ನ್ಯಾಯ ಸಂಹಿತೆ (BNS) ಅಡಿಯಲ್ಲಿ ಪ್ರಕರಣ ದಾಖಲಿಸಿ ಆರೋಪಿ ಯಶ್ನನ್ನು ಬಂಧಿಸಿ ಜೈಲಿಗಟ್ಟಿದ್ದಾರೆ.
ಕದ್ದ ಚಿನ್ನ ಮಾರಲು ಪತ್ರಕರ್ತರೇ ಏಜೆಂಟರು: ಪ್ರಕರಣದ ಬಿಗ್ ಟ್ವಿಸ್ಟ್!
ಈ ಪ್ರಕರಣದಲ್ಲಿ ಕೇವಲ ಯಶ್ ಮಾತ್ರವಲ್ಲದೆ, ಇಬ್ಬರು ಪತ್ರಕರ್ತರು ಕೂಡ ಶಾಮೀಲಾಗಿರುವುದು ರೋಚಕ ತಿರುವು ನೀಡಿದೆ. ಜಿತೇಂದ್ರ ಸೋಮಾನಿ ಹಾಗೂ ರೋಹಿತ್ ಪ್ರಸಾದ್ ಎಂಬ ಇಬ್ಬರು ಪತ್ರಕರ್ತರು ಕದ್ದ ಚಿನ್ನವನ್ನು ಮಾರಾಟ ಮಾಡಲು ಯಶ್ಗೆ ಸಹಾಯ ಮಾಡಿದ್ದಾರೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಗೋಲಾಘಾಟ್ನ ಚಿನ್ನದ ಅಂಗಡಿಯೊಂದರಲ್ಲಿ ಈ ಒಡವೆಗಳನ್ನು ಮಾರಾಟ ಮಾಡಿರುವ ಸುಳಿವು ಪೊಲೀಸರಿಗೆ ಲಭ್ಯವಾಗಿದೆ.
ಸದ್ಯ ಜೋರ್ಹತ್ ಪೊಲೀಸರು ಕಳವಾಗಿರುವ ಚಿನ್ನಾಭರಣಗಳನ್ನು ಜಪ್ತಿ ಮಾಡಲು ಭರ್ಜರಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಕದ್ದ ಹಣ ಬೇರೆ ಎಲ್ಲೆಲ್ಲಿ ಖರ್ಚಾಗಿದೆ ಮತ್ತು ಈ ಕಳ್ಳತನದಲ್ಲಿ ಗೆಳತಿ ಹಾಗೂ ಪತ್ರಕರ್ತರ ಅಸಲಿ ಪಾತ್ರವೇನು ಎಂಬುದರ ಬಗ್ಗೆ ಸಮಗ್ರ ತನಿಖೆ ಮುಂದುವರಿದಿದೆ. ಹೆತ್ತವರ ಬೆವರ ಹನಿಯ ಸಂಪಾದನೆಯನ್ನು ಶೋಕಿಗಾಗಿ ಹಾಳುಮಾಡಿದ ಮಗನ ಕೃತ್ಯ ಈಗ ಸಾಮಾಜಿಕ ಜಾಲತಾಣಗಳಲ್ಲಿಯೂ ಭಾರಿ ಚರ್ಚೆಗೆ ಗ್ರಾಸವಾಗಿದೆ.