ಹಬ್ಬವೆಂದರೆ ಕೇವಲ ಸಡಗರವಲ್ಲ, ಅದು ಕಷ್ಟದಲ್ಲಿರುವವರ ಕಣ್ಣೀರು (Humanity) ಒರೆಸುವ ಸುಸಂದರ್ಭ ಕೂಡ ಹೌದು. ಈ ಮಾತನ್ನು ಅಕ್ಷರಶಃ ನಿಜವಾಗಿಸಿದ್ದಾರೆ ಚಿಕ್ಕಬಳ್ಳಾಪುರ ಜಿಲ್ಲೆಯ ಗುಡಿಬಂಡೆಯ ಎಲ್ಲೋಡು ಶ್ರೀ ಲಕ್ಷ್ಮೀ ಆದಿನಾರಾಯಣ ಸ್ವಾಮಿ ಬ್ರಾಹ್ಮಣ ಸೇವಾ ಸಂಘದ ಪದಾಧಿಕಾರಿಗಳು. ಬಾಗೇಪಲ್ಲಿ ತಾಲೂಕಿನ ಗೂಳೂರು ಗ್ರಾಮದ ಕಡು ಬಡತನದಲ್ಲಿರುವ 85 ವರ್ಷದ ವಯೋವೃದ್ಧೆ ಇಂದಿರಮ್ಮ ಅವರ ಮನೆಗೆ ನೇರವಾಗಿ ತೆರಳಿ ನೆರವು ನೀಡುವ ಮೂಲಕ ಸಂಘವು ಮಾನವೀಯತೆಯ ದೊಡ್ಡ ಸಂದೇಶ ಸಾರಿದೆ.
Humanity – ಜಾತ್ರೆಯಲ್ಲಿ ನೀಡಿದ್ದ ಭರವಸೆ ಈಗ ನನಸು
ಕಳೆದ ಫೆಬ್ರವರಿ ತಿಂಗಳಲ್ಲಿ ನಡೆದ ಎಲ್ಲೋಡು ಜಾತ್ರೆಯ ಸಂದರ್ಭದಲ್ಲಿ ಇಂದಿರಮ್ಮ ಅಜ್ಜಿಯವರು ತಮ್ಮ ಕುಟುಂಬದೊಂದಿಗೆ ಆಗಮಿಸಿ ಸಂಘದ ದಾಸೋಹದಲ್ಲಿ ಪಾಲ್ಗೊಂಡಿದ್ದರು. ಆ ಸಮಯದಲ್ಲಿ ಅಜ್ಜಿಯ ದೈನೇಸಿ ಸ್ಥಿತಿಯನ್ನು ಗಮನಿಸಿದ್ದ ಸಂಘದ ಪದಾಧಿಕಾರಿಗಳು ಅವರಿಗೆ ಸಹಾಯ ಮಾಡುವ ಭರವಸೆ ನೀಡಿದ್ದರು. ಅದರಂತೆ ಯುಗಾದಿ ಹಬ್ಬದ ಈ ಸುಸಂದರ್ಭದಲ್ಲಿ ಸಂಘದ ಪ್ರಧಾನ ಪೋಷಕರಾದ ವೇದಬ್ರಹ್ಮಶ್ರೀ ಮಂಕಾಲ ಶ್ರೀಹರಿ ಶರ್ಮಾ ಅವರ ಮಾರ್ಗದರ್ಶನದಂತೆ ಅಜ್ಜಿಯ ಮನೆಗೇ ತೆರಳಿ ಮೂರು ತಿಂಗಳಿಗೆ ಸಾಕಾಗುವಷ್ಟು ದಿನಸಿ ಕಿಟ್ ನೀಡಲಾಗಿದೆ. ಸುಮಾರು 50 ಕೆ.ಜಿ. ಅಕ್ಕಿ, ಸಕಲ ದಿನಸಿ ಪದಾರ್ಥಗಳು, ತಾಜಾ ತರಕಾರಿ ಮತ್ತು ಹಣ್ಣುಗಳನ್ನು ವಿತರಿಸಿ ಅಜ್ಜಿಯ ಹಸಿವನ್ನು ನೀಗಿಸುವ ಪ್ರಾಮಾಣಿಕ ಪ್ರಯತ್ನ ಮಾಡಲಾಗಿದೆ.
ವೈಯಕ್ತಿಕ ಕಾಳಜಿ ಮತ್ತು ಪ್ರೀತಿಯ ಕಾಣಿಕೆ
ಕೇವಲ ಸಂಘದ ವತಿಯಿಂದಷ್ಟೇ ಅಲ್ಲದೆ, ವೈಯಕ್ತಿಕವಾಗಿಯೂ ಅಜ್ಜಿಯ ಮುಖದಲ್ಲಿ ನಗು ಮೂಡಿಸುವ ಕೆಲಸ ನಡೆದಿದೆ. ಸಂಘದ ಖಜಾಂಚಿ ಸಿ.ಪಿ. ರಾಘವೇಂದ್ರ ಅವರು ಅಜ್ಜಿಗೆ ಹೊಸ ವಸ್ತ್ರಗಳು ಮತ್ತು ಹಣವನ್ನು ನೀಡಿ, (Humanity) ಹಬ್ಬವನ್ನು ಯಾವುದೇ ಆತಂಕವಿಲ್ಲದೆ ಆಚರಿಸುವಂತೆ ಹಾರೈಸಿದರು. ಇಂದಿರಮ್ಮ ಅಜ್ಜಿಯೊಂದಿಗೆ ಅವರ ತಮ್ಮನ ಮಗ ನರೇಶ ಎಂಬ ಬಾಲಕ ವಾಸವಿದ್ದು, ಇವರಿಬ್ಬರ ದಿನನಿತ್ಯದ ಊಟದ ವ್ಯವಸ್ಥೆಯನ್ನು ಅಜ್ಜಿಯ ತಂಗಿ ಸುನಂದಮ್ಮ ನೋಡಿಕೊಳ್ಳುತ್ತಿದ್ದಾರೆ. ಆದರೆ ಇಡೀ ಕುಟುಂಬದ ಆರ್ಥಿಕ ಸ್ಥಿತಿ ಕುಸಿದಿರುವುದು ಮನಕಲಕುವಂತಿದೆ.
ಸೋರುತ್ತಿರುವ ಮನೆ ಮತ್ತು ಅಜ್ಜಿಯ ಸಂಕಷ್ಟ
ಸಹಾಯದ ಹಸ್ತ ತಲುಪಿದೆಯಾದರೂ ಅಜ್ಜಿಯ ವಾಸದ ಪರಿಸ್ಥಿತಿ ಮಾತ್ರ ದಯನೀಯವಾಗಿದೆ. ಅಜ್ಜಿ ವಾಸವಿರುವ ಮನೆಗೆ ಸರಿಯಾದ ಶೌಚಾಲಯದ ವ್ಯವಸ್ಥೆ ಇಲ್ಲದೆ ಈ ಇಳಿವಯಸ್ಸಿನಲ್ಲಿ ಅವರು ಪರದಾಡುತ್ತಿದ್ದಾರೆ. ಮಳೆಗಾಲ ಬಂತೆಂದರೆ ಮನೆಯ ಮೇಲ್ಚಾವಣಿ ಸೋರುತ್ತಿದ್ದು, ಮನೆಯ ಸುತ್ತಮುತ್ತಲ ಪರಿಸರವೂ ಅನೈರ್ಮಲ್ಯದಿಂದ ಕೂಡಿದೆ. ದೈನಂದಿನ ಅನ್ನಕ್ಕೇ (Humanity) ಪರದಾಡುತ್ತಿರುವ ಅಜ್ಜಿಗೆ ತನ್ನ ಮನೆಯನ್ನು ದುರಸ್ತಿ ಮಾಡಿಕೊಳ್ಳುವುದು ಅಸಾಧ್ಯದ ಮಾತಾಗಿದೆ. ಈ ಎಲ್ಲಾ ಸಮಸ್ಯೆಗಳನ್ನು ಹತ್ತಿರದಿಂದ ಕಂಡ ಸಂಘದ ಸೂರ್ಯಪ್ರಕಾಶ್, ಸಿ.ಎಸ್. ಶ್ರೀನಾಥ್ ಮತ್ತು ಎ. ಶ್ರೀಧರ್ ಅವರು ಅಜ್ಜಿಯ ಯೋಗಕ್ಷೇಮ ವಿಚಾರಿಸಿ ಧೈರ್ಯ ತುಂಬಿದ್ದಾರೆ.
Read this also : ಎಲ್ಲೋಡು ಶ್ರೀ ಲಕ್ಷ್ಮೀ ಆದಿನಾರಾಯಣಸ್ವಾಮಿ ಬ್ರಹ್ಮರಥೋತ್ಸವ ಅದ್ದೂರಿ: ಭಕ್ತಸಾಗರದಲ್ಲಿ ಮೊಳಗಿದ ‘ಗೋವಿಂದ’ ನಾಮಸ್ಮರಣೆ!
ದಾನಿಗಳಿಗೆ ಕರೆಯೋಲೆ ಮತ್ತು ಮಾನವೀಯ ಮನವಿ
ಎಲ್ಲೋಡು ಬ್ರಾಹ್ಮಣ ಸೇವಾ ಸಂಘವು ತಾತ್ಕಾಲಿಕವಾಗಿ ಅಜ್ಜಿಗೆ (Humanity) ಆಹಾರದ ಭದ್ರತೆ ನೀಡಿದೆ. ಆದರೆ ಇಂದಿರಮ್ಮ ಅವರಿಗೆ ಸುಸಜ್ಜಿತವಾದ ಒಂದು ಸಣ್ಣ ಮನೆ ಮತ್ತು ಶೌಚಾಲಯದ ಅಗತ್ಯವಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆಯ ಉದಾರಿಗಳು ಮತ್ತು ಸಹೃದಯವಂತ ದಾನಿಗಳು ಇಂದಿರಮ್ಮ ಅವರ ನೆರವಿಗೆ ಧಾವಿಸಬೇಕೆಂದು ಸಂಘದ ಪದಾಧಿಕಾರಿಗಳು ವಿನಂತಿಸಿದ್ದಾರೆ. ಅಜ್ಜಿಯ ಬಾಳಿನಲ್ಲಿ ಸ್ಥಿರವಾದ ನೆಮ್ಮದಿ ತರಲು ಸಮಾಜದ ಪ್ರತಿಯೊಬ್ಬರೂ ಕೈಜೋಡಿಸಬೇಕಿದೆ.